وفرى فلوسك وقللى فواتيرك عايزه تعرفى ازاى؟ ادخلى هنا

هنقول لك ازاي توفري فلوسك؟!
وتقللي من قيمة فواتيرك؟!
وخصوصاً لو كنتِ لسه في بداية حياتك
واتفاجئتِ إن كل حاجة بقت غالية نار.
ولو عايزة تعرفي ازاي؟!!!
يبقى لازم تتابعينا....



ــ 1 ــ
علشان توفري في الكهرباء
دلوقتي هقولك على شوية حاجات ممكن تعمليها علشان توفري في كمية الكهرباء اللي بتستهلكيها كل يوم..خليكِ معايا...

افصلي الأجهزة


لازم تتأكدي إنك تفصلي الكهرباء عن كل الأجهزة اللي بتستعمليها، مش بس تطفيها لأنه ثبت إن الأجهزة حتى لو مطفية بس متوصلة بالكهرباء بتسحب 30% من قوتها الكهربائية.

اقفلي الكمبيوتر


لازم تتأكدي إنك تقفلي الكمبيوتر في حالة عدم استعماله، لإنه بيستهلك كهرباء عالية جداً، كمان علشان تحافظي عليه من إنه يتلف بسبب ارتفاع درجة الحرارة.


اطفي الأنوار


اطفي كل الأنوار في الأماكن اللي بتكوني مش متواجدة فيها، وبالطريقة دي هتوفري كتير جداُ من فاتورة الكهرباء، وهتقللي من درجة الحرارة اللي بيسببها النور خصوصاً في الصيف.

قللي من استعمالك للتكييف


مش لازم تستعملي التكييف طول الوقت في الصيف، واهتمي دايماً إنك تفتحي الشبابيك في البيت علشان تحصلي على تهوية طبيعية، وكمان تتخلصي من الهواء الفاسد والمكتوم في البيت، وبكده تحافظي على صحتك وتقللي من كمية الكهرباء اللي بيستهلكها التكييف، كمان ممكن تستعملي مراوح السقف كبديل للتكييف أيام الصيف، وتأكدي دايماً إن كل الفتحات حوالين الشبابيك تكون مسدودة كويس علشان تمنعي سخونة الجو من إنها تدخل للبيت.


استعملي لمبات موفرة للطاقة

استعملي اللمبات الموفرة في الطاقة بدل اللمبات العادية لأن النوع ده من اللمبات بيوفر جداً في الكهرباء، وكمان كفاءتها عالية جداً وبتعيش فترات طويلة، وبتقلل من نسبة ثاني أكسيد الكربون في الجو، وعلى فكرة النوع ده من اللمبات متوفر جداً في السوق دلوقتي وبألوان كتيرة.


غسالة الأطباق


ياريت توقفي غسالة الأطباق قبل ما تبدأ في دورة التجفيف وافتحي الباب شوية وخلي الهواء هو اللي ينشف الأطباق، لأن دورة التجفيف دي بتستهلك طاقة عالية جداً، ولو بتفكري إنك تشتري غسالة أطباق جديدة يبقى لازم تاخدي بالك كويس من كمية الكهرباء والميه اللي بتستهلكها.


انشري هدومك..

في أيام الصيف ممكن تنشري الغسيل بدل ما تستعملي دورة التجفيف في الغسالة، عشان توفري في الطاقة، وكمان الشمس بتقتل البكتريا وبتعقم الهدوم، وياريت لو تغسلي هدومك بماء بارد علشان توفري الطاقة اللي بتحتاج لها الغسالة في تسخين المياه.





ــ 2 ــ
علشان توفري في الميه!!

وإنت بتاخدي حمامك


حاولي تقللي من استهلاكك للميه أثناء الحمام وياريت لو تركبي رأس للدش بتنزل كمية أقل من الميه.



صلحي الحنفيات

اتأكدي إنك تصلحي كل الحنفيات اللي بتسرب الميه عندك في البيت، كمان استغلي الماء البارد اللي بينزل من الحنفية، وإنتي مستنية الميه السخنة في إنك تملي جردل ميه مثلاً ممكن تستعمليه بعد كده في تنظيف البيت، واتأكدي دايماً من إنك تقفلي الحنفيات لو إنت مش محتاجة لها، يعني مثلاً وإنت بتغسلي أسنانك مش لازم تسيبي الحنفية مفتوحة طول الوقت.


لو هتغسلي الأطباق بنفسك


لو معندكيش غسالة أطباق وهتغسليهم بنفسك يبقى أحسن حاجة إنك تجمعي الأطباق كلها مع بعض في طبق كبير فيه ماء ساخن وشوية صابون سائل بس مش كتير، وانقعيهم لمدة دقائق عشان الدهون اللي عليهم تذوب، وبعد كده ابدأي اغسليهم بليفة المواعين، وبعدين انقليهم في طبق تاني فيه ماء دافئ نظيف علشان تشطفيهم فيه، وبكده تكوني وفرتي جهد ووقت وميه وصابون.



قللي من كميات الغسيل


ياريت لو تحاولي تقللي من كميات الغسيل، وبالتالي هتوفري كتير في استهلاكك للميه وهتقللي من عدد مرات استخدام الغسالة، وبالتالي هتوفري في كمية المسحوق اللي بتستعمليه، والأهم من كده إنك هتحافظي على القماش لفترة طويلة من غير ما يدوب ولونه يبهت من كتر الغسيل، ودي شوية أفكار ممكن تعمليها:
• مثلاً لو كل فرد من أفراد أسرتك بيستعمل فوطة ممكن إنه ينشرها بعد ما ياخد دش علشان تنشف من الميه، وبكده ممكن إنها تفضل فترة أطول من غير ما تحتاج لغسيل.
• كمان خلي عندك لبس معين قديم علشان تعملي بيه شغل البيت، والبسي الهدوم العادية في الوقت اللي بتكوني فاضيه فيه، وبكده مش هتحتاجي تغسليهم كتير.
• ممكن تلبسي التي شيرتات والقمصان والجينز كذا مرة قبل ما تحتاجي لأنك تغسليهم.
• اجمعي كل الحاجات اللي محتاجة إنها تتغسل مع بعض واغسليهم مرة واحدة.


سيفون الحمام


دلوقتي هقولك على حركة ذكية أوي تعمليها علشان تقللي كمية الميه اللي بتنزل من السيفون كل مرة بتستخدميه فيها، وهي إنك تحطي زجاجة بلاستيك مليانة ميه ومقفولة كويس داخل السيفون، وعشان تثبتيها كويس ممكن تحطي فيها شوية رمل أو حصى، وبالطريقة دي هتشغلي مساحة كبيرة من السيفون من غير ما تحتاج تتملي ميه.





ــ 3 ــ
قللي من القمامة



قبل ما نتكلم في الموضوع ده عايزاك تفكري..
إنت بتطلعي كمية قمامة أد إيه كل يوم من بيتك؟!

فكرتِ كويس....
ودلوقتي بقى هقولك ازاي ممكن تقللي الكمية دي وتوفري الفلوس الكتير اللي بتدفعيها علشان تتخلصي منها:
• حاولي دايماً إنك تستعملي الحاجات اللي مش بتترمي مع أول استعمال يعني مثلاً استعملي القماش لتجفيف الأطباق بدل المناديل الورقية.
• لما تيجي تشتري طلبات البيت، خدي معاكِ شنط من القماش علشان توفري كمية الأكياس البلاستيك الكتيرة اللي بترجعي بيها من السوق.
• ممكن تستخدمي بواقي الطعام والفضلات في إنك تعملي سماد طبيعي للزرع اللي عندك، بس المهم إنك تحفظي فضلات الطعام دي في مكان دافئ وفيه فتحات للتهوية.
• استخدمي البطاريات اللي ممكن تتشحن كذا مرة وبكده هتوفري في شراء البطاريات وكمان هترمي عدد أقل في الزبالة خصوصاً إن البطاريات دي فيها مواد سامة جداً ممكن تلوث التربة وتقتل الزرع.



وفي النهاية أحب اقولك إنك لو عملتِ الحاجات دي كلها
إنت مش بس هتوفري فلوسك وتقللي قيمة فواتير بيتك
ده إنت كمان هتكوني بتساعدي في توفير كميات كبيرة من الطاقة
علشان مستقبلك ومستقبل أولادك
ومستقبل الكرة الأرضية كلها
يعني لازم تبدأي من دلوقتي..
وكمان تشجعي أصحابك وجيرانك على توفير الطاقة
ولو عندك أفكار تانية مفيدة
ياريت تبعتي لنا
سلام

شكرررررررررررررا