مِن إنفلونزا الخنازير
خوفنا يا ناس ملهوش تبرير .........................
......................... مِن إنفلونزا الخنازيـــــــــــر
الفيرس ما هوُ نفس الفيرس .........................
............................. بس اتحَصَّن بالتطويـــــر
في بلاد بره يوم ما اكتشفوا .........................
....................... عملوا بحوث من غير تقصير
واحنا هنا واقفين نتفرَّج .............................
........................... مستنيين إيه هيصيـــــــــر
مِن إنفلونزا الخنازير
ــــــــــــــــــــ
قالوا الحجاج لما يعودوا .............................
............................ الفيروس هيكون ف إديهُم
خلـُّونا خايفين نقابلهُم ...............................
............................ علشان منسلـِّمش عليهُم
يعني الناس طاهره ومبروكه ......................
............................... ليه احنا بنشـَكـِّك فيهُم
ربك هوَّ اللي بيحميهُم .............................
........................... من غير حُقنه أو تخدير
يا إنفلونزا الخنازير
ــــــــــــــــــــ
قـُلنا للأطفال أولادنا .............................
.................... العفريت هيجيلكم ( حابـِس )
التلميذ يبعِد لو جنبُه ...............................
........................ أى زميل واقِف أو جالِس
علشان هوَّ العفريت نفسُه .........................
........................... بس بيعمِل إبن مدَارس
خلـُّوا الطلبه قاعده وخايفه ......................
.............................. أحسن يعْدِيهُم شرِّير
من إنفلونزا الخنازير
ــــــــــــــــــ
كام مدْرسه قفلوها وفوري .......................
....................... علشان شكـُّوا ف واد تلميذ
جالـُه زكام وشوَّية كـُحه ..........................
........................ قالوا الفيرس جه يا حفيظ
خلـُّوا ولادنا تروَّح بيتها .........................
.......................... من غير تفرِّقه أو تمييز
مين ف العالم فـَضـَىَ مدارس ...................
.............................. بأوامِر من أي وزير
يا إنفلونزا الخنازير
***
موضوع: مِن إنفلونزا الخنازير 
الجمعة 22 يناير 2010 - 21:35
