اللي عاوز مصر

اللي عاوز مصر

اللي عاوز مصر يدخل جوَّه قلبــــــــي
واللي عاوز منها عون فورا ًتلبِّــــــــي
مصر ضمَّه ف حُضنها النيل الجمـيل
إللي خيره ع الجميع مش مِستخبِّـــــي
ـــــــــــــــــ
مصر أبدًا مش ولد أهبل مِـــــريِّــــل
تاه ف وسط الزحمه علشان هوَّه عيِّل
مصر كانت للأمم هيَّه المنــــــــــاره
صيتها في التاريخ عَلـَم ومهوش قـُليِّل
ــــــــــــــــ
مصر موجوده وعمر ف يوم ما ضاعِت
حتى لو هابب عليها ريح مُباغِـــــــــــت
برضو عارفه طريقها مهما الحال يمِيـل
عمرها ما اتأخـرِّت أو حتى تاهِــــــــت
ــــــــــــــــ
مصر هيَّه أم كل الدنيا ديَّــــــــــــــــــا
من زمان ما اتغيَّرت فيهـــا الهوِّيـــــه
مجدها بيشير إليه مليون دلِيـــــــــــــل
والسنين مهما تِعدِّي هيَّه هيَّـــــــــــــه
ــــــــــــــــ
مصر تعرفها صحيح لو جيت تهاجـِر
أو تغيب عنها شهـُــور وايّام مِسافِــر
متلاقيش ليها مُشابـِه أو بَديـــــــــــل
وان قِدِرْت على البعاد يبقى انت صابر
ــــــــــــــــ
ليــــه يا ناس ديما بنجلِد نفسِنــــــــــــا
ليــــه نقول أشياء مُسيئه لإسمِنـــــــــا
والتـُهـَم تِنزل علينــــا بدون دليــــــــل
تِبقىَ زي سِم هـــــاري يسِمِّنــــــــــــا
ــــــــــــــــ
ليه بنظلِم روحنا مــــــا بين الجيــــران
مصر دايما خيرها ع الناس من زمان
للي شاكِر واللي ناكِر للجميـــــــــــــل
برضو هيَّه المُستجار والمُستعــــــان
ـــــــــــــــــ
مصر مهما أي ظالِم جار عليهـــــــا
بكره يعرف إنـُه كان الحق ليهـــــــا
لمــــا يلقى غصن معدنها الأصيـــــل
ليه جذوره ف أرضهــا والنيل راويها
ـــــــــــــــ
مصر برضو هتبقى دايمًا هيَّه مصـــر
الأبيَّــــــــه والكريمــــــه ف كل عصر
تِتـْنِقل أخلاق ولادهــــــــــــا لكل جيل
وان حصل كبوَّه تقوم دايمــــًا بنصر

**********

ياواد يا ابو قلب كبيررررر